~قصيدة بمناسبة عيد الأم~

وحشاني يا أمي
محتاجلك
مشتاقلك
تخديني في حضنك
وتضميني لصدرك
اللي سقاني
واللي رواني
واللي اداني
سنين من عمرك
مهما كبرت
يا أمي أنا ابنك
إدعيلي يا أمي
من غيرك يحمل همي
إن كنت صغير ولا كبير
من قلبك تتمنيلي الخير
وياما قسيتي
وضحيتي
علشاني كتير
من كل مخاطر تحميني
وبأغلى ما عندك تديني
وبكل حياتك تفديني
مين زيك في الدنيا ياامي
وحشاني يا أمي
محتاج لدعاك
بأتمنى رضاك
محتاج لو لحظة
أكون وياك
زي زمان محتاجلك وأكتر
وأنا قدامك طفل صغير
مش هتغير
وعلى بعادك
ما أقدرش أصبر
فاكره يا أمي؟؟
لما كنتي بتبعدي عني
ألقا حنانك ليه واخدني
وأفضل ابكي
لحد ما تيجي
ولما بتسمعي صوتي بتجري
وبتخديني ف حضنك دُغري
فكره يا أمي
لما كنتي تنادي عليه
واد يا أسامه
صوتك لسه معشش فيه
أنا وحشاني الكلمه دهيه
طبعا فاكره
مين في الدنيا بينسى ضناه
يما آسيتي مني الآه
ياما طيرت النوم من عينك
ياما عذبتك
ياما بكيتك
مين هيكافأك غير الله
فاكره ياأمي
يا أعظم أم
دايما كنتي شايله الهم
وياما شقيتي
وياما عانيتي
وياما سهرتك
أنا دلوقتي
كتير محتاجلك
محتاج تدعيلي من قلبك
عايش غربه
وأيام صعبه
وبعاني فيها ورب الكعبه
أنا عارف انك حساني
حاسه بأوجاعي وأشجاني
وبقلبك حاسه وشايفاني
ولما الأيام بتضيق بيه
الاقيك قدامي وحواليه
قلقانه وبتخافي عليه
في عنيكي نظرة حنية
وأنتي يا غالية
حبك أكبر حب يا أمي
حبك جوه عروقي ف دمي
عمري ما شوفت حنان في حنانك
أو أحضان تشبه أحضانك
وأنا بين إيدك
حاسس كل الدنيا أمان
حتى لمابتيجي في خيالي
أو على بالي
القى دموعي
نزلت مني
غصب عني
ماانتي يا امي أحب الناس
عايز ابوس الإيد والراس
أنا بتمنى تراب رجليك
وبعمري وحياتي أفديك
وكتير جدا مشتاق ليك
وأضمك ليه ف أحضاني
ما انتي بجد كتير وحشاني