فلسطين يا موطني ---- من الشعر الشعبي الفلسطيني

من طرف صقر السياسة 2008-05-27, 5:13 pm

فْلِسْطين يا مَوْطِني يـا بَسْمَـةَ الأيّـامْ

لَوْحات حُسْنِك مِنِ الرَّحْمـن مَرْسومـي

يا قُبْلِة الرّوح ، يَ الزَّهْرِ النَّدي البَسّـامْ

يا لَحِن ساكِن أبَد في قْلـوبْ مَكْلومـي

شُفْتِك بَعينِ العَقِل أحْلى مِـنِ الأحْـلامْ

وشُفْتِك بِعيـنِ الحِلِـم آيـاتْ مَرْقومـي

وشافِك ملاكِ الحَلا ، اسْتَحْلى حَلاكِ وْنامْ

فِ عْيونْ لونِ المِسِك بِالطّيب مَخْتومـي

يا حُلْوَتي سُلْوَتـي فـي دُنْيَتـي أقْـلامْ

سْمِعْتِ نَهيدي وْبَكَت دَمْعات مَحْرومـي

وْأوْراق شُ مْبَعْثَرَة مِثْلي بِـدونِ نْظـامْ

عاشَت مَعايي عُمُر وِهْمومْهـا هْمومـي

فْلِسْطين إنْـتِ أنـا، قَلْبيـنْ مِـن آلامْ

جُرْحين وِلْدو سَوى بْأقْـدار مَحْتومـي

طيرين عِرْفو الهَوى وِتْبادَلـو الأنْغـام

وِبْكُل نَغْمِـة صَـدى أنّـات مَكْتومـي

فينيق جِفْنو غِفي وما غِفْيَـتِ الأعْـوامْ

كُل عام بُمْرُق بِصَحّي عْوام مَحْمومـي

وكَنْعانْ مِرْجِ ابِن عامِر ما نِسيلو وْشامْ

دَقّو عَ وَجْنِة مَرِج بِالجـود مَوْسومـي

قَدّيش طِفْلِك بَكى ، قَدّيش شيخِـك قـامْ

يِبْحَث عَ ذاتِ الطَِّفِل فِ بْيوت مَهْدومي

وْقَدّيش ضَمِّ القَبِر فِ الرّاحِتين عْظـامْ

بِ نْياب فَكِّ الكُفُر يا حيـف مَهْشومـي

شُ بْقول يا حُلْوَتي يَ مْذَهَّبـي الهِنْـدامْ

نادَت نُجومِ السّما تـا تُرْقًصـي قومـي

حَقِّك عَلينا الفَرَح مَهْما فَضائِـك غـامْ

ومَهْما دُروبِ العُمُـر بـارود مَلْغومـي

لا تِرْكِني لليَـإس وِتْطاوِعـي الأوْهـامْ

لا خير فـي أمِّـة بِتْعيـش مَوْهومـي

مَهما عَ حُرَّة وْأصيلِـة تْكالَبـو الظُّـلّامْ

بِتْظَلّ حُرَّة ، وَلَـوْ بِتْعيـش مَظْلومـي

خَلّي رَبيعِـك شَـذى تَيْعَطِّـرِ الأنْسـامْ

وخَلّي نَسيمِك لَحِـن أشْعـار مَنْظومـي

وخَلّي دُموعِك نَدى زَرْزَرْ عَلى الأكْمامْ

وْعا كُل شِفِّة وَرِد قُبْـلات مَهْضومـي

ذوبي خَجَل وِاسْتِحي يا ريشَةَ الرَّسّـامْ

قُدّام سِتِّ الحُسُن تا تِفْطَـري صومـي

هذي فَلَسْطين بَـوْحِ الـرّوح وِالإلْهـامْ

وِرْواحْنا بِالفِدى عـا طـول مَلْزومـي

من طرف محمد مشهور هرشة 2008-05-29, 5:30 am

مشكور اخي
وبالمزيد
تقبل مروري

من طرف معتصم ابو حطب 2008-05-31, 5:05 am

مشكووووووووووووووووووووووووووووووور

من طرف محمد مشهور هرشة 2008-06-04, 4:21 am

مشكورررررررررر

رد: فلسطين يا موطني ---- من الشعر الشعبي الفلسطيني